فيديوهات شرح سوليد ورك..ورسومات اولى ميكانيكا..

[el shaer]

ندخل على الدرس التاني ياجماعة

وهو شرح لامر "exctrude "

ونبتدي مع الفيديو

التحميل من هنا

اهم ميزة في برنامج السوليد ورك

واللي بتميزه عن اي برنامج تاني

هي فكرة انه برنامج بيسهل رسم الاشكال ال3d

وعشان كده هو مخصص لرسم ميكانيكا

وامر exctrude ده من الاوامر على كده

ازاي بضغطة واحدة على الماوس

تحول المربع اللي هو 2d لمكعب في الــ 3d

الدايرة لاسطوانة..والمستطيل لمتوازي مستطيلات

ده اللي هاتشوفوه في الفيديو ده..

وهاوضح حاجات منه فشوية صور

وبعد كده افتح باب الاسئلة ..

نتكلم عن النقط اللي بيتناولها الفيديو

(1)


الصورة دي بتوضح ازاي تفتح لوحة الرسم ..

زي ماقولنا في اول درس ..

انك عشان تشتغل بتفتح البرنامج ..وبعدين تجيب new .. وبعدين part

طب وبعدين؟!

زي ماواضح في الصورة في خط رايح بتفرعتين

واحدة منهم لكلمة sketch اللي عندك فوق

ودي بقى صفحة الرسم اللي هاترسم فيها

يعني عشان ترسم اي حاجة ع السوليد ورك لازم تدوس على sketch دي الاول

كانها بالظبط لوحة الرسم اللي بتاخدها معاك عشان ترسم فيها في السكشن

بعد مابتدوس عليها بيظهرلك اللي ظاهر في التفريع التاني من السهم ده

وهي المستويات

ياترى انت عايز ترسم من انهه مستوى

عايز تبتدي الرسم من الفرونت ولا السايد "اللي هو رايت" ولا الplane "اللي هو الtop"

دول اهم خطوتين في اي رسمة

انك تفتح ال sketch وتختار المستوى اللي هاتشتغل فيه..


ندخل على تاني صورة

(2)


هو هنا بيطبق امر extrude على مربع عايز يخليه متوازي مستطيلات

فبعد مابيفتح السكتش زي ماقولنا ويختار المستوى

بيختار من عندنا من فوق كلمة rectangle اللي على يمين كلمة line دي بالظبط كده

بتدوس عليها بالماوس وتيجي فاي حتة فالصفحة وتعمل مستطيل باي ابعاد بالماوس برضه ..

وبعدين تظبط انت الابعاد زي مانت عايز

هاتقولولي ازاي ؟!

هاقولك بطريقتين

(1) ودي الغالبة انك تظبط الابعاد نفسها وتدي الارقام اللي عندك فالرسمة..هتلاقي على شمال كلمة line اللي بنقول عليها حاجة اسمها smart dimension ..اضغط عليها بالماوس وتعالى دوس على اي خط

من الاربعة اللي فالمستطيل كليك شمال.. هتلاقيه اخضر زي ما واضح في الصورة كده

وطلعلك خانة تحط فيها البعد اللي انت عايزه

اللي هو عملها 50 فالصورة


ده طبعا هاتعمله مع اي بعد فاي رسمة هاترسمها

smart dimension وحط البعد ..

ندخل ع الحاجة التانية وهي مهمة فانك تخلص الرسم بشكل اسرع وتظبط معاك

وهي (2) add relation اللي انا حاططها فدايرة برتقالي ع اليمين دي

دي فايدتها انك تربط علاقة حاجة بحاجة من معطيات الرسمة ..يعني مثلا ضلعين متساووين او متوازيين ..

او دايرتين ليهم نفس المركز..كل دي حاجات عشان تعملها في الرسومات محتاج الامر ده "add relation"


هتلاقي عندك ع الشمال الخطين البرتقالي بيوضحولك ايه انواع العلاقات اللي متاحة ع الخطين دول

انك عايزهم متساووين ولا متعامدين ولا متوازيين ..ولا عايز خط منهم افقي او عمودي

بتستخدم كل علاقة على حسب حاجتك

هو هنا خلى الخطين متساووين عشان يبقى مربع ..فاختار equal..

المشاركة الجاية اوضح حاجات تانية

بس يارب اكون قادر اوصل المعلومة كده..

يتبــــع..

[el shaer]

ندخل على تالت صورة

(3)



الصورة دي بقى بتوضح الامر اللي احنا بنتكلم عنه وهو امر exctrude

هتلاقي الامر ده متشاور عليه باول خط برتقالي من التلاتة

عندنا فوق ..دوس عليه كليك شمال هايظهرلك القايمة اللي على الشمال دي

تاني خط برتقالي بتحدد فيه نوع الــexctrude اللي انت عايزه

وهاوضح الانواع مع الصورة الجاية والفرق بينهم

الخط التالت..بتختار منه قيمة الــextrude

يعني في الصورة دي معمول 10 عشان كده تلاقي في سهم رصاصي لورا

ودرجة الظل بالبني لفاتح عندك لحد 10

لو عايز بقى تطبق الــexctrude ده يعني تعمله بــ10يبقى ازاي؟!

كل عليك انك تدوس ع الصح الخضرا اللي فوق

نخش ع الصورة اللي بعد كده

(4)




القايمة بتوضح انواع ال exctrude

والاختلاف اللي مابينهم في نوع الحاجة المطلوب منك تحددها

يعني

*blind ,mid plane

بيبقى مطلوب منك تحدد قيمة الexctrude

زي ماوضحت ع الصورة اللي فاتت..والفرق بينهم

ان blind بيبقى الامتداد في اتجاه واحد يعني يايمين الرسمة ياشمالها

انما الmid plane بيحط الرسمة في النص ويشتغل على الاتجاهين يمين وشمال بمعنى

انك لو عايز تعمل اكسترود للمربع ده 20

لو اخترت blind هاتحط قيمة الاكسترود 20 عشان الامتداد في اتجاه واحد

انما لو اخترت mid plane هاتحطه ب10 بس ليه؟! لانه هايضيف 10 يمين و10 شمال

اتمنى تكون وضحت كده

*الباقي up to body ..surface ..vortex..offset

كلهم بيختلفوا على الاتنين اللي فاتوا انك مابتحطلهمش قيمة للاكسترود ..لا دانت بتختار السطح اللي بيوصله الاكسترود

يعني لو انت عندك اسطوانة واخرها متوازي ..رسمت المتوازي

وعايز تعمل الاسطوانة بحيث ان اخر الاكسترود بتاعها يبقى سطح المتوازي

بتختار up to surface

وتدوس على سطح المتوازي كليك شمال

وتدوس على صح الخضرا اللي فوق

يعملك الاكسترود

الفيديو هتلاقي فيه موضح ده بالتفصيل

عمل تلات رسومات كتطبيقات مستطيلين ودايرة..

اتمنى اكون وضحت اللي كنت عايز اوصله من خلال الشرح..

واي اسئلة انا تحت امركم

وعشان نبقى عمليين انا هاطلب تطبيق

application

التلات رسومات المعمولين في الفيديو

ياريت الناس تعملهم وترفعهم نشوف كده المواهب

في انتظاركم..

[Eng-Memo]

للامانه انا مش قريت كل الكلام يا شاعر
بس ع العموم تشكر يا غالى
و الفيديو اخدته طبعاً هههههههه
شكراااااا على مجهودك معانا

[twilight]

والله يا بشمهندس مش عارفين نشكر حضرتك ازاى
جزاك الله كل خير

[el shaer]

للامانه انا مش قريت كل الكلام يا شاعر
بس ع العموم تشكر يا غالى
و الفيديو اخدته طبعاً هههههههه
شكراااااا على مجهودك معانا

هههههههههههههههههه

ولايهمك ياغالي

عموما لو في حاجة مش واضحة فالفيديو

باذن الله تلاقيها مشروحة فالكلام

منورني ياميمو

في انتظار التطبيق ياكبير..

دمت بكل خير..

[el shaer]

والله يا بشمهندس مش عارفين نشكر حضرتك ازاى
جزاك الله كل خير

لا شكر على واجب ياتوي لايت

اتمنى ان الموضوع يكون افادك

وتتابعيه باذن الله

دمت بكل خير..

[el shaer]

طلب اخير من الناس اتمنى

من المتابعين للموضوع

نشر لينكات الشرح لزملاؤهم في الدفعة

بحيث انه يفيد اكبر عدد ممكن من طلاب اولى

جزاكم الله كل خير..

[Eng-Memo]

طلب اخير من الناس اتمنى

من المتابعين للموضوع

نشر لينكات الشرح لزملاؤهم في الدفعة

بحيث انه يفيد اكبر عدد ممكن من طلاب اولى

جزاكم الله كل خير..

ننشره ازاى يعنى ،، مش فاهم .. طب ما هو ع المنتدى هنا !!

في انتظار التطبيق ياكبير..

دمت بكل خير..

صعبه شويه التطبيق دى يا شاعر
لان النسخ اللى عندى مش شغاله ع الويندوز
و انا مستنى نسخه البشمهندس احمد جاد جابهالى بس بعد ما اخدتها لقيت عليها فايروسات و هيجيبهالى تانى
لسه فى انتظارها ،،

[el shaer]

ننشره ازاى يعنى ،، مش فاهم .. طب ما هو ع المنتدى هنا !!

بمعنى ان لينك الميديا فاير ياغالي

تنشره للناس الي معاك في الدفعة وتعرفهم

سواء عن طريق الفيس او الميل

بحيث اكبر عدد يستفيد منه ويبقى جزاك الله خيرا

وماشي ياغالي مفيش مشاكل ..

مش مهم تطبيق دلوقت

لحد ما البرنامج يبقى موجود باذن الله

منورني ياريس..

[el shaer]

الفيديو التالت

وهو شرح لامر"exctrude cut"

وده الامر الخاص بعمل الـــ holes

ازاي تعمل فراغ او تجويف في بارت

الفيديو من هنا

هانزل شرح ليه فوق بعد كده

بس انا هاسيبكم تتفرجوا عليه

ولو في اي اسئلة تحت امركم..